गजल

नझारुँ भन्दा भन्दै जब आँशु झर्छ प्रिय
छाँती चित्त सबै सबै फाँटे झै गर्छ प्रिय

झर्दा झर्दै मिठा याद दुःख्दै दुःख्दै बगेर
खोल्सो, खहरे मिशिदै समुन्द्र भर्छ प्रिय

आँशुका ढिका ढिकामा ऐना हेर्दै आफ्नो
प्रतिबिम्बले रुन्चे मुस्कान छर्छ प्रिय

हराए पछि सँगैका पाइलाका दुइ डोब
एक्लो पाइला अगाडी कसरी बढ्छ प्रिय

गड्याङ गुडुङ ढाकिएर कालो बादल
खुसी उडाई दर्किएर पानी पर्छ प्रिय

विश्वाशको आधारलाई फन्न घुमाएर
चित्त दुःखाई कसैले किन सुख हर्छ प्रिय।